انصار: ( د کب ۵ مه)، د طالبانو د رژیم ویاند ذبیح الله مجاهد، په افغانستان کې د اساسي قانون د نشتوالي نیوکو ته په غبرګون کې ادعا کړې، چې د دغه قانون نشتوالی، قانوني تشه نه ده.
د هغه په وینا، اساسي قانون لرل مهم دي، خو دوی یې په نشتوالي کې له اسلامي شریعت څخه د قانون په توګه استفاده کوي.
مخکې طالب ویاند ویلي وو، چې دوی د اساسي قانون د جوړولو چارې ګړندۍ کړي او ژر به دغه قانون بشپړ شي، خو په تازه څرګندونو کې یې په دې تړاو څه نه دي ویلي.
د طالبانو منقدان د دوی رژیم، د نړۍ یوازینی بې قانونه حاکمیت بولي او په خپلسریو او سلیقوي چلندونو یې تورنوي؛ هغه ادعا چې طالب چارواکي یې بې اساسه ګڼي او برعکس د عدالت او ټولو خلکو د حقونو د خوندیتوب ادعا کوي.
د طالبانو له بیا واک ته له رسېدو وروسته، د دوی رژیم د ۱۳۸۲ کال اساسي قانون تعلیق کړ او د عدلیې وزیر یې له ځینو تعدیلاتو سره په هېواد کې د ۱۳۴۳ کال اساسي قانون د نافذیدو خبر ورکړ.
لږه موده وروسته طالب چارواکي له دې اعلان څخه بېرته په شا او د خپل اساسي قانون د جوړولو یادونه وکړه، خو تراوسه یې په دې برخه کې د پایلو خبر نه دی ورکړی.
URL تعقيب: https://www.ansarpress.com/pashto/30273
